ACTUALIZACIÓN: Seguindo as instrucións da Universidade da Coruña e as recomendacións sanitarias para a prevención da expansión do coronavirus, aprázase a Xornada de Adiccións prevista para o 13 de marzo, evitando así posibles situacións de risco de contaxio para as persoas relatoras e asistentes.

Proximamente anunciaremos a nova data, para a que se manteñen as inscricións realizadas.

—-

O grupo de traballo Miolo, sobre Educación Social no ámbito da saúde, organiza en colaboración da Universidade da Coruña a xornada ‘Educación Social e adiccións. Experiencias socioeducativas en Galicia’.

Esta xornada está dirixida tanto a profesionais de centros de atención a persoas con adiccións como a estudantes e voluntariado con interese por este ámbito. Pretende difundir e poñer en valor as experiencias que se están a levar a cabo no ámbito das adiccións en Galicia, crear ou fortalecer redes entre as entidades que traballan neste eido en Galicia, así como destacar a importancia da profesión de Educación Social e do labor socioeducativo neste ámbito.

O prazo de inscricións estará aberto ata o 9 de marzo.

ACTUALIZACIÓN: Seguindo as recomendacións sanitarias para a prevención da expansión do coronavirus, aprázase esta actividade, evitando así posibles situacións de risco de contaxio para as persoas relatoras e asistentes.

Proximamente anunciaremos a nova data, para a que se manteñen as inscricións realizadas.

—-

O grupo sobre Animación Sociocultural e Xestión Cultural organiza esta actividade na que se abordará as distintas tipoloxías de persoal nas administracións locais, os procesos selectivos, RPT…

A inscrición é de balde e está aberta ata o 10 de marzo, tendo prioridade as persoas colexiadas do Ceesg ou estudantes amigas do Ceesg.

Este ano o movemento feminista, baixo o lema “Sen coidados non hai vida. Mudando o sistema, derrubando o patriarcado”, volve poñer o foco de atención nos coidados, colocándoos no centro das nosas vidas.

Desde o Colexio de Educadoras e Educadores Sociais de Galicia, Ceesg, consideramos que temos a responsabilidade social de outorgar aos coidados un lugar prioritario nos nosos debates e reflexións, nun dobre sentido:

• Por un lado, a necesidade dos coidados nunha profesión, a Educación Social, onde as mulleres somos maioría; unha profesión invisible e infravalorada social e economicamente, que nos sobrecarga de tarefas, con escaso recoñecemento e con condicións laborais precarias.
• E, por outro, a responsabilidade que temos como profesión que traballa xunto á cidadanía nos espazos familiares, onde segue sen existir unha redistribución equitativa das tarefas domésticas e dos coidados.

Os traballos de coidados están feminizados, e son realizados en contextos de invisibilidade, social e económica, así como desde a precariedade e falta de recoñecemento. Por outra banda, o Estado segue sen garantir recursos e servizos suficientes para atender ás demandas crecentes de coidados, entre a poboación máis miúda, e tamén, entre a poboación maior e aquela que se atopa nunha situación de dependencia.

Ante este escenario, desde o Ceesg, neste 8 de marzo, MANIFESTAMOS:

1. O rexeitamento ás políticas sociais, laborais e económicas que implican un retroceso nos dereitos e conquistas sociais: recortes e privatización de servizos públicos como os servizos sociais, a educación e a sanidade.
2. O dereito a un traballo digno e á corresponsabilidade nas nosas vidas.
3. A necesidade de repensar o público e o común para situar a reprodución da vida e o benestar no centro das prioridades da nosa sociedade.
4. A necesidade de establecer estratexias diferentes e alternativas á externalización dos coidados, permitindo exercer os coidados a aquelas mulleres e homes que así o desexen dun xeito digno.
5. A revisión das xornadas laborais que dificultan unha infancia con dereito a gozar de tempo compartido en familia, así como o exercicio dunha marentalidade e/ou parentalidade positiva.
6. O papel clave da Educación Social na transformación da sociedade, xa que traballamos para o desenvolvemento integral das persoas, libres de prexuízos e de estereotipos de xénero.
7. A reivindicación dunha educación na ética dos coidados e no recoñecemento efectivo dos dereitos sociais.
8. A necesidade dunha cultura comunitaria, baseada nas relacións de veciñanza, a xestión participativa e o uso compartido dos bens e dos espazos públicos, onde poder construír sororidade e redes de apoio; porque o colectivo facilita a vida de toda a cidadanía.
9. O noso apoio ás mobilizacións e manifestacións previstas por todo o país, convidando a todas as mulleres a sumarse e participar.

Sen nós o mundo non produce nin se reproduce.

#EducaciónSocialéCoidados

Santiago de Compostela, 6 de marzo de 2020.

Descargar Manifesto en pdf

Con motivo do Día Internacional da Muller, que se conmemora o 8 de marzo, o CGCEES creou o hashtag #EdusoESFeminismo para visibilizar nas redes sociais as achegas da Educación Social.

Ademais, o Ceesg, a través do seu grupo de traballo Fiadeiras, elaborou un manifesto que podes consultar na web do Ceesg

A Editorial Mad ofrece descontos ás persoas colexiadas na venda de temarios de oposicións.

No seguinte enlace están activados eses descontos para os temarios de ‘Educador/a’ da Xunta (25% de desconto) e os da especialidade Intervención Sociocomuntiaria de Educación (30% de desconto)

Enlace para facer pedidos

CONDICIÓNS:

O pedido debe facerse a través da plataforma indicada e enviarase por correo postal, e o pago farase contra reembolso.

Os envíos a partir de 90€ (netos) faranse sen coste adicional en cocpeto de portes (só en Península) Para pedidos de menor cuantía o pedido incrementarase en 5€ (para enviós a Canarias, Baleares, Ceuta e Melilla, consultar condicións)

Só se procesarán pedidos realizados por persoas colexiadas ou amigas do Ceesg.

Acordo vixente ata o 31/12/2020.

O Ceesg non organiza nin patrocina esta actividade, nin se fai responsable do seu contido nin das condicións de contratación, que serán directamente coa empresa ofertante.

A Asemblea Xeral é o órgano supremo de toma de decisións do colexio, formado por todas as persoas colexiadas. Cada ano reúnese como mínimo unha vez para marcar o rumbo do colexio.

A xornada da Asemblea 2020, ademais, será un espazo para o encontro, para o intercambio e para o recoñecemento. Por iso a Asemblea vén acompañada dunha serie de actos abertos ao público, como son a formación sobre o Informe socioeducativo (ISE), a presentación do nº 13 da revista Galeduso –monográfico sobre Educación Social e Escola-, a entrega de premios da 5ª e 6ª edición do Concurso TFG.eduso, e o acto de nomeamento como Colexiado de Honra de Alberto Fernández de Sanmamed Santos. Rematando a xornada, celebrarase a Asemblea, na que se exporán as memorias de actividades e económica, se debaterán os plans de traballo e orzamentos para o 2020 e se sorteará unha inscrición gratuíta ao VIII Congreso Estatal de Educación Social.

Para unha mellor organización, pregamos confirmar asistencia. Tamén queremos xestionar posibles desprazamentos ata o lugar de celebración, polo que, se non tes posibilidade de desprazamento ou se vas levar o coche e tes algunha praza libre que poidas ofrecer, infórmanos para organizalo.

Data: venres 28 de febreiro de 2020.

Lugar: Pazo de Mariñán (Bergondo)