ACTUALIDADE
Fiadeiras ofrece a formación ‘Son de Fiar’ en retallos, é dicir, en anacos que cada participante pode ir fiando ata compoñer o seu propio coñecemento sobre os Feminismos e incorporalo na intervención socio-educativa.
Esta actividade está dirixida a todas as colexiadas e colexiados, de xeito gratuíto. O acceso aos contidos estará aberto na zona privada da web www.ceesg.org.
Cada semana publicarase na web un novo Retallo, o primeiro o 1 de xuño, e o último o 6 de xullo. Para respectar os diferentes ritmos, a formación quedará dispoñible uns días máis, ata finais de xullo.
Poderá emitirse certificado de participación ás persoas que se inscriban, debendo realizar as pequenas actividades que se incluirán nos retallos.
A duración estimada para a realización do curso, e que se contemplará no certificado de quen o solicite, é de 12 horas.
Para inscribirte, envíanos a ficha de inscrición. Admítense inscricións ata o 7 de xuño.
Para coñecer máis detalles, olla a seguinte presentación:
Descargar ficha de inscrición
Presentación dos Retallos ‘Son de Fiar’
Acceso aos retallos
Hoxe é un día máis no almanaque. Un día máis no que tentamos volver ás nosas vidas, rutinas e ritmos, coas presas e a habitual falta de tempo para pararnos a reflexionar cunha perspectiva máis ampla ca imposta polo predominio do inmediato.
Hoxe pasará desapercibido, e non recordaremos nin recoñeceremos como é debido o traballo e o esforzo realizado durante tanto tempo e por tantas persoas, colectivos e organizacións para tratar que a sociedade adique un chisco da súa atención a observar o que ten ao seu redor, e que cada vez máis rápido está a perder: ecosistemas, saberes de profundas raizames, tecido sociocomunitario.
Mais hai moitas sementes que estes meses comezaron a brotar entre veciñas e veciños, amizades, profesionais, cidadanía en xeral: apoio mutuo, solidariedade, preocupación e acción polo ben común.
Dende a Eira do Ceesg pensamos que agora, como educadoras e educadores sociais, tócanos recoñecer estas sementes de comunidade, agarimalas para axudalas a agromar e tecer redes que as fagan medrar fortes. Porque dende a Educación Social temos moito que dicir e que facer para construír colectivamente presentes e futuros nos que comunidade e sustentabilidade se sitúen como eixos vertebradores de novas sinerxías e xeitos posibles de vivir no mundo.
Por iso hoxe, Día Internacional do Medio Ambiente, e todos os días do ano:
- Reclamamos o ámbito comunitario e ambiental como un espazo interdisciplinar e interdependente onde a Educación Social estea presente de xeito activo.
- Reivindicamos profesional e socialmente a importancia do desenvolvemento comunitario e a educación ambiental en clave pedagóxica e social nos contextos locais, incidindo nas súas posibilidades transformadoras.
Cremos que o desenvolvemento comunitario e a educación ambiental son ámbitos básicos para comprender e situarnos neste contexto de crise sistémica permanente que nos tocou vivir.
Porque pensamos que estas vías nos servirán de axuda para afrontar todo o que está por vir.
Porque precisamos valorar e coidar o planeta no que vivimos, mais recoñecendo a relevancia que ten a acción socioeducativa en clave local e comunitaria.
Hoxe, e todos os días do ano:
Sen Educación non hai transformación
Somos Educación Social
A Eira do Ceesg.
Colexio de Educadoras e Educadores Sociais de Galicia.
5 de xuño de 2020. Día Mundial do Medio Ambiente.
O vindeiro luns 8 de xuño o Ceesg retoma a actividade presencial con cita previa.
Temos desenvolvido un plan de transición á nova normalidade, no que entre outras cousas recollemos as obrigas, tanto para traballadoras como para visitantes, de:
- Manter distancia
- Uso de máscara
- Uso de xel hidroalcólico, que haberá na entrada
- Unha persoa como máximo no interior
- Permanecer o mínimo tempo posible
- Atención con cita previa
Ademais recoméndase usar os servizos de xeito telemático, sempre que sexa posible.
Podes consultar o Plan de transición á nova normalidade do Ceesg: VER PLAN
O Ceesg acaba de poñer en marcha un plan de continxencia que contempla medidas de prevención que afectan á actividade das persoas traballadoras, das persoas da Xunta de Goberno e Grupos de Traballo, e a algúns servizos dirixidos a persoas colexiadas. Os servizos afectados son os seguintes:
Suspéndese a atención presencial dende o 13 ao 27 de marzo. Atenderase no horario habitual por teléfono ou correo-e. Actualización 25/03/20: Prorrógase esta situación ata novo aviso.
- Ao servizo de biblioteca non se pode acceder de xeito presencial. Poderanse solicitar exemplares que se enviarán a través de correo postal.
- Suspéndese/Aprázase calquera actividade, xuntanza, etc.
- Suspéndese o servizo de préstamo de instalacións e recursos do Ceesg ata novo aviso.
Así mesmo, dende o Ceesg realízanse unha serie de recomendacións para o exercicio da profesión VER RECOMENDACIÓNS
O plan de continxencia irase actualizando segundo a evolución da situación.
PLAN DE CONTINXENCIA CONTRA O CORONAVIRUS
Plan de continxencia contra o coronavirus 13-03-20
O Grupo de Estudos e Intervencións Xeragóxicas do Colexio de Educadoras e Educadores Sociais de Galicia quere comunicar a súa preocupación ante a nova de manter pechados os centros de día para maiores ata o mes de setembro. Aínda alegando á seguridade cidadá como máxima motivación para tomar unha decisión deste tipo, consideramos que é unha medida que agrava a situación vital de centos de persoas maiores que sofren demencias e outras enfermidades dexenerativas e que son usuarias deste tipo de servizos.
Coa fin de promover a súa saúde, adóptase unha decisión que favorece o contrario. A asistencia a un centro de día non se limita a ser unha axuda á conciliación familiar, senón que parte de entender ao usuario/a como persoa de pleno dereito, que elabora o seu propio proxecto vital no devir dos seus días, contando ao seu redor cun equipo interdisciplinar que, a través das súas intervencións, acompaña neste proceso e orienta as actuacións.
As necesidades de terapias especializadas deben ser atendidas e, seguindo a adopción das medidas adoptadas pola Xunta de Galicia, non están sendo tidas en conta: estase privando ás persoas maiores de recibir unha atención esencial e necesaria.
Tendo en conta o exposto, dende o GEIX solicitamos a reconsideración desta decisión pois só deste xeito sería posible seguir levando a cabo unha atención especializada e de calidade, intentando mellorar a calidade de vida das persoas maiores e retardar os efectos negativos das enfermidades que sofren, así como a continuidade de cara a acadar unha ‘nova normalidade’ dentro da súa comunidade próxima.
Grupo de Estudos e Intervencións Xeragóxicas (GEIX) do Colexio de Educadoras e Educadores Sociais de Galicia.
3 de xuño de 2020
Nesta semana na que o goberno central vai explicitar os detalles sobre a implementación do Ingreso Mínimo Vital e a súa cobertura, desde o Ceesg queremos xerar debate, reflexión e diálogo sobre a Renda Básica Universal (RBU) como medida social que comezamos a reivindicar desde fai máis dun ano na Xornada ‘Renda Básica: o novo dereito social necesario’ (organizada en colaboración co Colectivo de Renda Básica da Coruña).
Para iso, durante esta semana, recuperaremos algunhas das conversas destas Xornadas sobre RBU relacionadas con diferentes ámbitos de intervención da Educación Social: xustiza social, feminismos, saúde mental, servizos públicos…
Compartiremos en redes sociais e na nosa web, actualizando diariamente.
Renda Básica e Xustiza Social.
Luns 25 de maio
Desde o Ceesg consideramos que Renda Básica incondicional faría á xente máis libre e liberaríanos ás profesionais da carga de decidir quen ten dereito á prestación e quen non.
Entrevista a Daniel Raventós sobre a necesidade de que exista unha maioría social a favor da Renda Básica, e que conte co apoio dos movementos sociais, partidos políticos e sindicatos.
Ver vídeo
Renda Básica e Feminismos.
Martes 26 de maio
Somos profesionais que pasamos o tempo fiando remendos, ante a situacións de emerxencia, cando o que tiñamos que estar facendo é fiando sinerxías coa comunidade e co resto de profesionais.
Nuria Alabao, Sarah Babiker Moreno e Leticia Castro Torres, educadora social, conversan sobre a imprescindible incorporación da perspectiva feminista.
Ver vídeo
Renda Básica e Dereitos Humanos.
Mércores 27 de maio
Desde o Ceesg consideramos que a Renda Básica Universal posibilita o desenvolvemento individual, familiar e colectivo, garante os dereitos humanos e subxectivos das persoas.
Carme Lizárraga Mollinedo, Thiago Santos Rocha e Belén Fernández Suárez conversan sobre a RBU como unha cuestión de Dereitos Humanos, que cobra relevancia xunto a outros dereitos básicos, como son a equidade e a xustiza social de cara ao benestar da comunidade.
Ver vídeo
Renda Básica e Servizos públicos.
Xoves 28 de maio
Desde a perspectiva da RBU, o noso labor como educadoras sociais, é a de repensar e reivindicar novos modelos de servizos sociais, que dean paso á análise e investigación dos contextos sociais e educativos nos que intervimos, coa finalidade de dinamizar, a través de equipos interdisciplinares, programas e proxectos de acompañamento, orientación, autonomía, protagonismo e horizontalidade que atendan as necesidades sociais, educativas, formativas e culturais da cidadanía.
Eva López Soto, Sergi Raventós Panyella e Julen Bollain Urbieta conversan sobre a vulnerabilidade como un problema estrutural, destacando os efectos
negativos desta situación na saúde integral das persoas, concretamente, na saúde mental.
Ver vídeo
Renda Básica e sostenibilidade ecolóxica.
Venres 29 de maio
Florent Marcellesi e Alberto Fraguas Herrero Florent amósannos a necesidade dun novo modelo socioeconómico e dentro dese desafío, un elemento fundamental é a Renda Básica. E unha aposta polo decrecemento, imprescindible en calquera modelo de refundación social e económica europea.
Ver vídeo
Renda Básica e Benestar Social.
Sábado 30 de maio
Koldobi Velasco e Duarte Crestar, do Colectivo pola Renda Básica de Compostela e educador social falan de procesos de empoderamento persoal e retecido comunitario.
Ver vídeo
Rematamos a semana adicada á RBU cunha enquisa realizada á poboación española durante este periodo de confinamento e co primeiro programa de radio de A Tribo, que achégannos as propostas de organizacións, profesionais dos servizos sociais e persoas en situación de pobreza sobre a Renda Básica, contando, entre outras coas voces de Eva López Soto, educadora social técnica de Servizos Sociais Comunitarios e do educador social e membro do Colectivo de Renda Básica da Coruña, Rodrigo Gil Cedillo.